كورد وەك قوربانی دەستی  ستەمكاری :

كورد وەك قوربانی دەستی  ستەمكاری :

ئەگەر بە وردی سەرنجی قورئان و ئایەتەكانی بدەین بۆمان دەردەكەوێت كە هیچ شتێك مەترسیدارتر نیە و شوێنكاری خراپی لەسەر مرۆڤ بەجێ ناهێڵێت و زیان بە كۆمەڵگە ناگەیەنێت  بێجگە لە ستەمكاری، تەنانەت خوای گەورە هاوتای دەكاتەوە لەگەڵ هاوەڵدانان بۆخۆی وەك دەفەرموێت : (إِنَّ الشِّرْكَ ڵظلْمٌ عَظیمٌ)

هەروەها خوای گەورە ستەمكاری بەمەرجەعیەتی گەندەڵی و وێرانكاری و لەناوچون ئەژمار دەكات و بە ئەو هۆكارەی دەزانێت كە دەبێتە مایەی وێرانی و گومڕایی و دووبەرەكی لە نێوان هاوڵاتیانی گەلێكدا و پارچە بوونی نیشتیمانەكەیان .ئەمڕۆ لە واقیعدا لە ئەنجامی ئەو ستەمكاریەی كە باڵی كێشاوە بەسەر زۆربەی گەلانی مسوڵماندا بارودۆخێكی ناهەموار دروست بووە لە چەوسانەوەو پێشێلكاری مافەكانی مرۆڤ و ڕێگرتن لە ئازادی تاك و كۆمەڵ، لەناو ئەو گەلانەشدا گەلی كورد یەكێكە لە گەلە ستەم لێكراوەكانی جیهانی ئیسلامی و بەهۆی دەسەڵاتە ستەمكاریەكانەوە هەتا ئێستا ڕێگایان نەداوە خاوەنی مافی چارەی خۆ نوسین بێت و كیانێكی سیاسی هەبێت و بە ئازادی بتوانێت بیروڕای خۆی دەرببڕێت .

ئەگەر مێژووی ئیسلامیش بخوێنینەوە بۆمان دەردەكەوێت كە هۆكاری سەرەكی هەموو ئەو گرفتانەی كە ئێستا لە جیهانی ئیسلامیدا هەیە لە دوا كەوتویی و نەفامی و هەژاری هەمووی دەگەڕێتەوە بۆ ئەوەی كە كۆمەڵێك دەسەڵاتی ستەمكار كاروباری ووڵات دەبەن بەڕێوەو لە پشتی ئەمانیشەوە دەسەڵاتێكی بەهێزتری جیهانی هەیە كە لە ڕێگەی ئەمانەوە سامانی نیشتیمانی ووڵاتەكان بۆ خۆیان دەبەن .

ستەمكاری و دەست درێژی و دوركەوتنەوە لە ڕاستی دوو جۆرە :

جۆری یەكەم / ستەم كردن لە بواری مافەكانی مرۆڤ، ئەمە یان پەیوەندی بە ڕێگرتن لە ئازادیە ئاینیەكانەوە هەیە یان پەیوەستە بە مافی ئازادی ژیان و خۆشگوزەرانی، كەسێك یان دەسەڵاتێك بێت و ئەم مافەی لێوەردەگرێتەوەو وا لە هاوڵاتی دەكات كە ژیانێكی زۆر ناخۆش بباتە سەر، یان پەیوەندی بە ڕێگرتن لە ئازادی بیروراِوز ئەقڵ و بۆ چوونەكانیەوە هەیە كە ڕێگا نادات هاوڵاتی بە ویستی خۆی بیر بكاتەوەو بۆ چوونەكانی دەرببڕێت، یان پەیوەندی بە بواری ئابوریەوە هەیە ناتوانێت لەم بوارەدا بە ئازادی كار بكات و وا لە خەڵك دەكەن بەشێوەیەكی گشتی بە هەژاری بمێننەوەو ئەگەر خاوەنی سەرمایەشبن بۆیان نیە بە ئازادی مامەڵەی پێوەبكەن و وەبەرهێنان ئەنجام بدەن، یان پەیوەندی هەیە بە پاراستنی ڕێزو كەرامەت و بەهاكانی مرۆڤ لەم ڕوانگەیەوە مرۆڤ لەسایەی دەسەڵاتی ستەمكاریدا وەك كۆیلە مامەڵەی لەگەڵدا دەكرێت و سوك و بێ بەها دەبێت و ڕێزو كەرامەتی مرۆڤ بوونی لەدەست دەدا .

جۆری دووەم / ستەمكاری بەرامبەر مافەكانی خوای گەورە، ئەویش بەدانانی هاوەڵ بۆیی و پارێزگاریكردن لەو سنورانەی كە بۆی داناوە ئەمەش دەچێتە بازنەی خواو بەندەوە چارەنوسیشی بەوە دیاری دەكرێت كە تاچەند خوای گەورە لە تاوانەكانیشی خۆش دەبێت لە قورئاندا شێوازێكی تایبەتی سیستەمی سیاسی باس نەكراوە بەڵام جەخت كراوەتەوە لەسەر ئەوەی كە سیستمی سیاسی دەبێت خاوەنی چەند بنەمایەك بێت لەوانەش دادپەروەری و ئازادی و پاراستنی ڕێزو كەرامەتی مرۆڤ هەروەها خوای گەورە پشتیوانی لە دەوڵەتێك دەكات كە دات پەروەر بێت ئەگەر بێ باوەڕیش بێت هەروەها دەوڵەتێكی ستەمكاریش لەناو دابات ئەگەر بەناوی ئیسلامیشەوە بێت ،ئەمەش ئەوەمان بۆ دەردەخات كە ئارامی و گەشە پێدان و پێش كەوتن لە ژێر سایەی سیستەمێكی داد پەروەردا دەبێت و لە ژێر سایەی سیستەمی ستەمكاردا هەرگیز هەست بە پێشكەوتن و ئارامی و گەشە پێدان ناكرێت .

قورئانی پیرۆز زۆر دژی ستەمكاری وەستاوەتەوە بەهەموو جۆرەكانیەوە گرنگیەكی زۆریشی بەم بابەتە داوە لە قورئاندا (هەشت سەد ئایەت) هەیە كە باس لە ستەمكاری و هاوشێوەكانی دەكات ئەویش بە جۆرەها ناو هاتووە لەوانەش (ستەمكاری، دەست درێژی، هێرش بردن) لەبەرامبەر هەموو ئەمانەشدا سەرزەنشت و نەفرەت و دور كەوتنەوە لە سۆزو بەزەیی خوا باس كراوە .

زۆر جار لەبەرامبەر بەردەوامبوونی ستەمكاریی بەتایبەتیش لە جیهانی ئیسلامیدا بێ هیوای ڕومان تێدەكات بەڵام ئەگەر سەیری قورئان بكەین لەوە دڵنیامان دەكاتەوە كە ستەمكاری و ستەمكاران لە دەستی خوای گەورە ڕزگاریان نابێت و ئەگەر بۆ ماوەیەكیش ڕێگایان پێ بدات بەڵام دوا جار دەیانگرێت و ڕزگاریان نابێت و توشی سەر شۆڕی دنیاو دوا ڕۆژ دەبن، لە قورئاندا وا باس دەكات كە ستەمكار ناتوانێت بە ڕوویەكی پاكەوە دنیا بەجێ بهێلێت و ناوبانگی باش بۆخی دروست بكات بەڵكو بەڵێنی خوایە كە دەبێت لە دنیادا ڕیسوا ببێت، تەنها ئەوانە نەبێت كە دەگەڕێنەوەو واز لە ستەمكاری دەهێنن و مافەكان دەگێڕنەوە بۆ خاوەنەكانیان .

ئەگەر سەیری گەلی كوردمان بكەین بە درێژایی مێژو لەسەر دەستی كۆمەڵێك دەسەڵاتی ستەمكار ستەمێكی زۆر لێكراوەو نیشتیمانەكەی پارچە پارچە كراوەو گەلەكەی توشی ئەو پەڕی ستەمكاری و چەوسانەوەو دەربەدەری و ماڵ وێرانی كراوە، بەڵام دەبێت لەوە دڵنیا بین كە خوای گەورە بێئاگا نەبووە لەو ستەمكاریانەو بەردەوام بۆیان لە بۆسەدا بووەو بە چاوی خۆشمان بینیومانە كە ئەو دەسەڵاتە ستەمكارانە لە دنیادا توشی چ ڕیسوایی و سزایەكی سەخت بوون و هەموو هێزو دەسەڵات و ناوبانگێكیان لە دەستداو بە ڕیسوایی دنیایان بەجێ هێشت ،واتە ئەو بەڵێنەی خوایان بەسەردا چەسپا كە پێش گەیشتن بە ڕۆژی دوایی توشی گەورەترین سزا بوون وەك دەفەرموێت : (ۆڵا تَحْسَبَنَّ اللَّهَ غَافِلًا عَمَّا ێعْمَلُ الظالِمُونَ إِنَّمَا یُۆَخِّرُهُمْ لِێوْمٍ تَشْخَصُ فِیهِ الْأَبْصَارُ)

بەڵام ئەوەی كە جێگەی داخە بۆ ئەو بارودۆخە نوێیە ئێمە وەك گەلی كورد خاوەنی پلانی ستراتیژی نەبوین و نەمان توانی بیكەینە هەلێك بۆ یەك خستنی تواناكان و بنیاتنانی كیانێكی سیاسی و گەشە پێدانی لە هەموو ڕوویەكەوە .

لە ئێستاشدا دەبێت ئێمە وەك گەلێكی ستەم لێكراو بڕوامان بەوە هەبێت كە لە خەباتمان بۆ ئازادی و سەربەخۆیی خوای گەورە پشتیوانیمان دەكات، بەڵام بەو مەرجەی كە دور بكەوینەوە لە ستەمكردن لە خۆمان و گەلەكەمان و پشتیوانی هیچ هێزێك و لایەنێك و كەسێكی ستەمكار نەكەین و هەموومان بە پارتە سیاسیەكان و ڕێكخراوەكانی كۆمەڵگەی مەدەنی هاوڵاتیانەوە خەباتمان یەك بخەین بۆ سەرخستنی عەدالەت و ئازادی و چەسپاندنی مافەكانی مرۆڤ و وەستاوە دژ بە گەندەڵی و ستەمكاری، چونكە پشتیوانی لە ستەمكاران پاشە ڕۆژێكی خراپی هەیە لە دنیاو دواڕۆژدا كە دەبێتە مایەی ئاژاوەو دووبەرەكی و شەڕی ناو خۆو گەندەڵی و دواكەوتویی و هەموو ئەمانەش بەشێوەیەكی گشتی دەبنە مایەی سزادانی ئەو گەلەی كە خۆی پشتیوانی ئەو ستەماكارانە دەكات .

مێژوو ئەوەمان بۆ دەگێڕێتەوە كە (جەعفەری بەرمەكی) كە پیاوێكی ستەمكارو توندو تیژ بووە لەسەردەمی هارونە ڕەشیدو ئەبوجەعفەری مەنسور، پاش ئەوەی خۆی و كوڕەكەی لەلایەن هارونە ڕەشیدەوە دەست گیر دەكرێن لە زینداندا كوڕەكەی لێی دەپرسێت ئایا چیمان كردووە وا ئێمەیان زیندانی كردووە ؟ ؟ باوكی دەڵێت : كوڕەكەم .. ئەوە پاداشتی ستەمكاریە، ئەم زیندانە تۆڵەی فرمێسكی ستەملێكراوانە، كوڕەكەم : ئایا دەبێت چەندان فرمێسك لە چاوی ستەملێكراواندا ڕژابێت و ئێمەش لە كۆشكدا خەریكی ئارەزو بازی و دەسەڵات و خۆش گوزەرانی بوین و بە گومڕاییەوە لە خوا بێ ئاگا بوین ؟

هەروەها خوای گەورە چیرۆكی عاد و سەمود و فیرعەون و قارون و هامان و ….. هتد ، بۆمان دەگێڕێتەوە ئێمەش دەبێت سودو پەندو ئامۆژگای لەو چیرۆكانە وەربگرین و متمانەمان بەخوای گەورە هەبێت كە خوا لە بۆسەدایە بۆ ستەمكاران و هەر لە دنیادا ڕیسوایان دەكات و لەبەرامبەریشدا پشتیوانی لە كەسان و گەلانی ستەملێكراو مسوڵمانانی چەوساوەو دڵ شكاو دەكات ئەگەر خاوەنی پلان و دیدگای تایبەتی خۆیان بن لە ڕوی سیاسی و ئابوریەوە بۆ بنیاتنانی سیستەمێكی چاك و كراوەو داد پەروەر .